Հայաստանի երեխաների առողջության հիմնադրամը պաշտոնապես գործում է 2021 թվականի հունիսի 1-ից՝ առողջական ծանր խնդիրներ ունեցող երեխաներին օգնելու նպատակով։ Հիմնադրամի աջակցությամբ բազմաթիվ երեխաներ անցել են տարբեր հետազոտություններ, ստացել թանկարժեք դեղորայքային և այլ բուժում Հայաստանում, իսկ տեղում նման բուժման բացակայության դեպքում ստացել են անհրաժեշտ բուժումը աշխարհի լավագույն կլինիկաներում:

Մինչև հիմնադրամի պաշտոնական մեկնարկը, կազմակերպության հիմնադիր Արմեն Մարտիրոսյանը երկար տարիներ անհատական մակարդակով աջակցել է առողջական ծանր խնդիրներ ունեցող երեխաներին ու նրանց ծնողներին՝ պարզապես որպես կամավոր։ Տաս տարուց ավել նա իր ընկերների օգնությամբ դրամահավաքներ է կազմակերպել և օգնել 400-ից ավել երեխայի բուժվել Հայաստանում կամ արտասահմանյան լավագույն կլինիկաներում:

Տարիների ընթացքում կուտակած փորձն ու գիտելիքը ցույց տվեցին՝ անհրաժեշտ է ավելի համակարգային մոտեցում, որպեսզի ավելի շատ երեխաներ որակյալ բուժօգնություն ստանալու հնարավորություն ունենան և ցանկալի է՝ առանց հայրենիքը լքելու։ Դա իր հերթին թույլ կտա զարգացնել հայաստանյան բժշկությունը։ Այդպես ստեղծվեց  հիմնադրամը, որը պահպանել է թիմի մարդասիրական ոգին, և միևնույն ժամանակ գործում է էլ ավելի համակարգված ու պրոֆեսիոնալ ձևով։

Արդյունավետ ու հետևողական աշխատանքի շնորհիվ մեր հիմնադրամը այսօր վայելում է հանրային մեծ վստահություն։ Վերջինիս շնորհիվ էլ մեզ հաջողվել է  դառնալ Հայաստանում գործող առողջապահական ուղղվածություն ունեցող ամենամեծ հիմանադրամներից մեկը և արդյունավետ համագործակցություն հաստատել հայաստանյան ու արտասահմանյան առաջատար կլինիկաների, պետական կառավարման մարմինների և մի շարք տեղական ու միջազգային կազմակերպությունների հետ։